CAGAYAN DE ORO CITY – Gikonsiderar na sa kapolisan nga ‘case closed’ ang nahitabong pagtigbas-patay sa armado’g sundang nga suspek ngadto sa motorela driver diha Tomasaco Street,Brgy Nazareth ning syudad sa miaging gabii.
Kini human namatay na ang suspek nga si Jolly Rocky Camson,42 anyos nga taga-Brgy Macasandig nga kasuhan unta’g murder tungod sa iyang pagtigbas sa biktima nga si Galiciano Geron Jr gumikan lamang sa bangi sa utang.
Miingon si Police Staff Sgt Federico Caamiño sa Nazareth Police Station nga modangop una sila sa ilang kadagkuan o sa city prosecutor’s office kon unsay angay buhaton kabahin sa gidangatan sa duruha ka kanhi magkaila.
Dumduman nga gitigbas ni Camson si Geron kay giingong wala kini nagtultol pagbayad sa giutang nga 33-mil pesos sa iyang kaipon.
Apan paglabay usab sa pila ka oras,kalit naglisod pagginhawa si Camson hinungdang gidali pagdala sa ospital diin nakabsan usab kini sa kinabuhi sa Sabado sa hapon.
