Malampusong gibuksan ang usa ka adlaw nga football cup nga gihalad alang sa pagpangita’g hustisya sa kamatayon ni kanhi legal researcher ug senior staff member National Irrigation Administration (NIA) Region 10 nga si Niruh Kyle Antatico. Miingon si Percival Batar, Tournament Director, nga ang kalihukan gitawag sa “Justice For Kyle Football Cup: A tribute tournament for Kyle Antatico”. Ang kalihukan gipahigayon sulod sa 4th 1D Camp Evangelista Football Field sa Brgy Patag, ning syudad. Ang dula gitambungan sa managlahing grupo ug kategorya.
Dugtong niini, mapasalamaton si Mike Batales, Presidente sa CDO Football Association sa pagtambong sa mga grupo gikan sa managlahing kategorya sa football tournament nga espesyal nga gipahigayon sulod lamang sa usa ka adlaw. Milaum si Batales nga pinaagi sa football, mapadayag nila ang ilang tiguha nga mahatagan sa pagdumdum ang kaso ni Antatico nga sa pagkakaron wala pa makuha ang hustisya kay padayon pa ang pagligid sa kaso ug wala pay natumbok nga mga mastermind sa pagsalvage kaniya. Hisayran nga usa si Antatico sa ilang kanhi aktibong miyembro sa asosasyon.
