Gibombardiyo sa tropang Ruso ang kaulohan sa Ukraine nga Kyiv pinaagi sa gatusan ka mga drones ug missiles, nga giisip karon nga usa sa labing ngil-ngig nga aerial assault sukad sa pag-ulbo sa gubat upat ka tuig na ang milabay.
Giuyog ang tibuok dakbayan human gipadala sa Russia ang ilang labing modernong Oreshnik hypersonic ballistic missile, usa ka lakang nga naghatag og grabeng hulga sa seguridad sa tibuok rehiyon.
Subay sa opisyal nga taho, nakabsan sa kinabuhi ang upat ka mga sibilyan samtang moabot ngadto sa gatosan ang nangaangol human direktang naigo sa mga pagbuto ang mga puy-anan, merkado, ug mga tunghaan.
Gipahayag sa Kremlin nga kini usa ka “retaliatory strike” batok sa Kyiv, apan dako ang pagtuo sa mga international observers nga usa kini ka stratehiya aron hingpit nga lumpagon ang moral ug ang energy grid sa Ukraine.
Taliwala sa kalampusan sa ukraine air force sa pag-intercept sa daghang drones, ang maong trahedya nagpadayag sa dinalian nga panginahanglan sa nasod alang sa mas lig-on nga anti-missile defense system gikan sa ilang mga alyado. (jane abulag)
