CAGAYAN DE ORO CITY – Gilayong gi-kondinar sa Cagayan de Oro Press Club o COPC officials ug members ang linu-og nga binuhatan diin gisunog sa wala pa ilhi nga mga responsabli ang media van nga iya sa beteranong magsisibya nga si Dr. Manny Jaudian sa lungsod sa Sagay,Camiguin kaganihang kadlawon.
Gibutyag ni COPC Pres. Froilan Gallardo sa gilugwa nila nga solidarity message nga dako kining pagyatak sa tawhanong katungod ug pag-ipit sa demokrasya ang nahiaguman sa respetado nga kanhi pangulo usab sa kahugpungan sa medya dinhi sa dakbayan.
Siya miingon nga dili kini makapaluya sa mga sakop sa prensa aron patak-umon sa mga paghatag sa mga tukmang mga impormasyon may kalabutan sa init nga kahimtang sa politika sa probinsya sa Camiguin.
Dugang sa multi-awarded media practitioner nga si Gallardo nga angayang magmatngon usab ang mga kauban niini sa propesyon kung mohimo’g coverages sa panahon sa eleksyon sa maong isla.
Dugtong niini,gidangop na sa COPC sa buhatan ni Police Regional Office 10 Director Brig Gen Jaysen De Guzman ang nahitabo ang Jaudian ingon man sa Malakanyang aron mahimuan sa seryoso nga imbestigasyon.
Dumduman nga bag-uhay pa gihinagbo sa Presidential Task Force on Media Security o PTFoMS ang mga magsisibya nga nakabase sa syudad sulod ning semanaha diin gipasalig nga proteksyonan batok sa bisan unsa nga linu-og nga mga binuhatan.
Hisayrang sa hinapos nga bahin usab ning bulana,isaulog na usab ang media week long celebration ning syudad diin dakong kasubo kay daw direktang pag-atake sa COPC ang nasinatian ni Jaudian nga kanhi presidente ug miembro sa kahugpungan.
