Sa iyang lab-as nga mensahe, ang bise presidente, kinsa giila nga lider sa oposisyon miingon nga apektado na ang himtang sa demokrasya sa nasud tungod kay gigamit ang mga institusyon sa gobyerno ug kwarta sa katawhan aron pugngan ang mga kritiko ug oposisyon inay nga sulbaron ang tinuod nga problema sa mga Pilipino.
Gipamugos sa bise presidente nga ang demokrasya dili mabuhi kung tan-awon sa mga naa sa gahum nga kaaway ang tanang kritiko ug hulga ang tanang kontra nga tingog.
Nagpadumdum si Duterte sa kadagkuan sa Senado ug House of Representatives nga kinahanglan magpabilin nga independente ug libre sa hulga ug presyur aron makabuhat sa ilang konstitusyonal nga katungdanan.
Lakip sa gikabalak-an sa bise presidente ang paglikay sa isyu sa flood control controversy; ang impeachment nga giingong politikal; ug hulga sa Charter Change nga giingon nga pamaagi sa pagpalapad sa gahum.
Sa iyang mensahe, iyang gipalanog nga ang katawhang Pilipino angay nga adunay gobyerno nga nagserbisyo sa katawhan ug naglig-on sa mga institusyon, ug dili gobyerno nga nagapanalipod lang sa kaugalingong gahum.
