Nanawagan ang Pangulo sa World Health Organization nga si Tedros Ghebreyesus nga magpakonsulta dayon sa doktor sa labing sayong mga timailhan sa sakit nga Ebola.
Giluwatan ni Tedros ang maong pahayag atol sa iyang pagbisita sa bag-ong natukod nga treatment center sa Bunia, Democratic Republic of the Congo.
Gipasiugda niya nga dako ang kahigayonan nga maulian ang pasyente kung madapatan dayon kini og medikal nga pag-atiman sa sugod pa lang sa sakit.
Ang maong panawagan gihimo dungan sa paspas nga pagsaka sa mga kaso sa Ebola nga nikatap na sa tulo ka probinsya sa sidlakang bahin sa maong nasod.
Gikabalak-an karon sa mga eksperto ang maong outbreak tungod kay gipahinabo kini sa talagsaong Bundibugyo strain nga wala pa’y aprubadong bakuna o tambal. (jane abulag)
