CAGAYAN DE ORO CITY – Gipasaka na sa piskalya sa korte ang kasong pagbaligya,paghupot ug paggamit sa ilegal nga droga batok sa walo ka suspected drug pushers nga naglakip sa anak ni City Mayor Oscar Moreno nga si Sean Moreno sa Angeles City,Pampanga.
Kini human unang nakuhaan si Bernice Fabiosa nga giingong hinigugma ni Sean ug laing unom ka kauban sa balor milyon pesos nga kantidad sa drugang ecstasy dihang napaubos sa buy bust operation sulod sa hotel sa maong syudad sa miaging Hunyo 29 ning tuiga.
Gibutyag ni PDEA-Central Luzon information officer Glenn Guillermo nga gihulat na lamang nila ang pagpagawas sa korte sa commitment order aron mabalhin na ang mga akusado sa city jail.
Gikompirmar usab ni Guillermo nga gibisita ni Atty Dale Brian Mordeno si Sean pipila ka adlaw gikan sa pagkasikop niini kuyog sila si Maria Isabel Lawas,Aileen Baldon, Jamie Mendoza, Jessa Scott,Bernadeth Saavedra, ug Gregorio Imperial.
