CAGAYAN DE ORO CITY – Gipalawman pa sa kapolisan ang imbestigasyon sa pagpamusil-patay sa usa ka rebel-returnee sulod sa iyang pinuy-anan sa Brgy Besigan ning syudad.
Giila ni Lumbia Police Station commander Maj Aldren Baculio ang biktima nga si Cydor Balanse Samparo, 24-anyos, ulitawo ug molopyo sa maong lugar.
Gibutyag ni Baculio nga may gihuptan na silang saksi sa krimen diin makatabang pagsulbad sa kaso.
Miguwa sa imbestigasyon sa kapolisan nga duha ka grupo o anaa sa 30 ka tawo ang mipusil-patay sa rebel returnee sa Brgy Besigan ning syudad.
Gibutyag ni Baculio nga base kini sa pahayag sa mga saksi sa krimen.
Gibutyag ni Baculio nga padayon pa gihapon nilang gipalawman ang imbestigasyon ilabina nga ilang nasayran nga walay kontra ang biktima sa maong lugar ug nagpakabuhi na lamang kini isip mag-uuma human mibalik sa sabakan sa gobyerno.
