CAGAYAN DE ORO CITY – Na-isyuhan sa citation tickets ang 109 ka mga motorista nga nadakpan sa gilusad nga anti-laway barrier campaign sa PNP sa rehiyon.
Kini alayon sa pagsugod na’g pagpangdakop sa PNP ngadto sa mga motorista nga nagpasakay sa ilang kapikas ug hinigugma nga walay gibutang nga barrier aron mapalig-on ang social distancing samtang nagbiyahe.
Miingon si Police Regional Office 10 spokesperson Lt Col Mardy Hortillosa nga bug-at sa ilang buot ang pagdakop sa mga motorista ning panahon sa pandemya apan igo ra usab sila nagsunod sa mando sa inter-agency task force sa kauluhan.
Namahayag ang opisyal nga aron kalikayan ang dugang dakop sa kadalanan angay dili na lamang una mohimo’g pagpang-angkas ang mga motorista samtang wala pa’y nataod nga standard barrier sa ilang motorsiklo.
Samtang dili pa gihapon mo implementar ang Roads and Traffic Administration o RTA sa anti-laway shield o barrier sa mga motorsiklo sa syudad.
Gitin-aw ni Col. Apolinario Hipolito, Executive Traffic Operation Officer sa RTA nga base sa guidelines, ang pulis, LTO ug LTFRB pa lamang ang mahimong maka- implementar sa kamanduan sa IATF nga pangdakpon ang mga magbaton sa backride bisan asawa o kapuyo basta walay barrier sa ilang motor.
Apan miingon si Hipolito nga kon uganing hatagan na silag deputazation sa LTO, mahimo na usab silang manakop sa mga makasupak sa maong kamanduan.
