CAGAYAN DE ORO CITY- Nadakpan sa hiniusang operasyon sa kapolisan,militar ug PDEA ang duha ka gidudahang sakop sa dakong sindikato sa ilegal nga droga nga naglihok sa Sultan De Naga Dimaporo,Lanao del Norte.
Kini human gilusad sa PR0-10 Drug Enforcement Group ang anti-illegal drug buy bust operation inabagan sa ubang unit sa PNP,AFP ug PDEA hinungdan nadakpan ang magtiayong si Jamalodin Musa Odin ug Asna Minalang nga pulos residente sa Purok 3,Brgy Calibo sa maong lungsod.
Miingon si Lanao del Norte Provincial Police Office spokesperson Maj Salman Saad nga nakompiskar gikan sa mga suspek ang usa ka kilo sa gitoohang shabu nga dunay estimated value nga 6.8 milyones pesos.
Nabawi usab sa raiding teams ang boodle money nga 2.8 milyone pesos,motorsiklo,celphone ug ubang ebendensiya sa maong operasyon.
Gihatagan sa hugot nga seguridad sa PNP ang kustodiya sa mga suspek tungod sa posibleng pagluwas sa ka-grupo niini nga naglihok ra usab sa boundary sa Lanao Norte ug Lanao del Sur.
