CAGAYAN DE ORO CITY – Gipusil-patay ang bag-ong laya nga piniriso gamit ang kalibre 45 nga armas sa Brgy 35 ning syudad kagabii.
Giila ang biktima nga si Ali Yaser Marandang, 27-anyos ug molopyo sa maong dapit.
Dali pa gidala sa ospital ang maong biktima apan gideklara kining nakabsan na sa kinabuhi.
Gibutyag ni Patrolman Winston Casinillo sa Cogon Police Station nga nagpadayon pa ang ilang gihimong imbestigasyon aron masuta ang motibo ug maila ang responsable sa krimen.
Inisyal milugwa sa imbestigasyon nga naglalis ang biktima ug ang suspek kabahin sa ibaligya nga motorsiklo nga nagresulta sa pagpamusil.
