CAGAYAN DE ORO CITY – Gipanganti sa PNP-Highway Patrol Group 10 nga ilang ipadayon ang pagpangkompiskar sa car accessories gikan sa mga motorista nga masapon sa gilusad nila nga One Time,Bigtime Operation palibot sa syudad.
Kini bisan kon miani’g pagbatikos sa pipila tungod sa giingong daw pinili nga pagpangdakop ilabina diha sa national highway sa Tablon sa syudad ning semanaha lamang.
Gihimo ni HPG-10 regional chief Col Niel Francia ang garantiya taliwala nga nakatilaw sila’g komentaryo gikan kang Manny Agustero sa Magnum Radyo nga nasita tungod sa illegal nga pagbaton sa red and blue blinker nga kasupakan sa balaod.
Miingon ang opisyal nga gidawat nila ang pagsaway apan nanganti nga walay palabyon nga mga motorista kon aktong masapon sa pagsupak sa lagda sa trapiko sa syudad.
Una usab niini,gitugyan sa maong magsisibya ang maong car accessories o gadgets kay dayag man nga kasupakan sa balaod apan gihagit ang PNP-HPG nga dili magpakabuta-bungol sa daw gihimo nang parking area sa mga dagkong sakyanan ang national highway sa Barangay Tablon sa dakbayan
.Hisayrang dugay na usab nga panahon nga daw inotil ang kagamhanan sa pagsumpo sa illegal parking sa kilid sa national highway nga usahay hinungdan sa mga dugu-ong disgrasya.
