CAGAYAN DE ORO CITY – Gi-depensa sa PNP ang ilang pagdakop sa ilado nga aktibista nga giingong sakop sa rebeldeng New People’s Army sa Caraga Region nga nakuha nila diha sa Lawesbra,Brgy Lapasan sa syudad sa miaging Domingo sa buntag.
Kini human dunay giatubang nga murder ug frustrader nga mga kaso ang dalaga nga 25 anyos si Renalyn Tejero nga taga-Surigao del Sur.
Miingon si Police Regional Office 10 spokesperson Capt Francisco Sabud nga dili basta-basta magawas sa korte ang warrant kon walay basehan ang mga sumbong batok kang Tejero kinsa nagsilbi nga paralegal officer sa grupong Karapatan-Caraga.
Subay sa PNP-13,giakusahan si Tejero nga dunay kalambigitan sa pagpatay sa kanhi NPA members nga sila si Zaldy Acidillo, 65 anyos ug Manobo tribal chieftain Bernandino Astudillo, 70 anyos niadtong Marso 2020.
Samtang nagdumili una paghatag komento o kompirmasyon ang 4th Infantry Division Philippine Army kabahin sa pagsikop sa gitoohang sakop sa rebeldeng New People’s Army nga si Renalyn Tejero diha sa Brgy Lapasan ning syudad.
Miingon si 4th ID spokesperson Maj Jhun Cordero nga mas nasayod ang PNP kabahin sa kalihukan ni Tejero hinungdan midistansya siya sa pagka-aresto niini.
Hinoon,gikompirmar sa opisyal nga may mga naila siya nga ka pareha’g mga apelyido sa dinakpan nga aktibo gyud nga lumilhok sa NPA didto sa Caraga Region.
