CAGAYAN DE ORO CITY – Obligahon na sa korte suprema ang law enforcement agencies nga naglakip sa PNP pagsul-ob sa body cameras sa pagsilbi sa search ug warrant of arrest batok sa suspected criminals dinhi sa nasud.
Kini human nauyuni sa mga mahistrado sa korte suprema nga moporma’g gabayan aron magamit sa taliabot nga operasyon sa state forces partikular sa mga paglusad sa anti-illegal drug buy bust operations.
Miingon si Supreme Court spokesperson Atty Brian Keith Hosaka nga ilang igawas ang gabayan nga maporma sa dili madugay aron magsilbing giya ug kalikayan na ang mga pagduda nga nag-abusar sa puwersa ang mga otoridad sa ilang mga himoong mga operasyon.
Samtang giila sa Police Regional Office 10 nga positibo nga lakang ang gihimo sa korte suprema kabahin sa pagpagamit sa body cameras sa ilang mga pulis sa anti-drugs operations nga usahay mo-resulta sa kamatayon sa ilang targeted suspected pushers.
Miingon si PRO 10 spokesperson Capt Francisco Sabud nga pinaagi unya sa maong gabayan,mawala na ang pagduda sa publiko nga dunay sagol nga binuang ang matag-operasyon sa kapolisan batok sa ilegal nga droga.
Hisayrang daghan sa anti-illegal drugs operations ang nag-resulta sa pagka-patay sa mga target kay ipamugos sa mga pulis nga misukol kanila ang drug pusher suspects.
