CAGAYAN DE ORO CITY – Nangayo’g hustisya ang ka live-in partner nga babaye sa gidangatan nga kamatayon sa iyang pares nga gipusil-patay sa naka-off duty nga kaubang sekyu sa gitrabahuan nga bunk house sa Manggahan,Brgy Balulang ning syudad.
Kini human gilayong namatay ang biktima nga si Reynato Meca,51 anyos sa dihang gipusil gamit ang kalibre 38 nga armas ni Jerson Cantomayor nga taga-Cabanglasan,Bukidnon hinungdan sa kamatayon niini.
Gibutyag ni Gng Maricel Semeni nga daan nang nagkalalis ang biktima ug suspek tungod sa isyu sa pagpalit sa sigarilyo nga wala damha nga mo-resulta sa pagpamusil.
Gilayong gidala sa kapolisan ang suspek samtang gipahimutang na ang patay’ng lawas sa maong biktima.
Nagbaton sa walo ka anak ang mag-live in partner.
Samtang giangkon sa sekyu nga suspek pagpamusil sa dump truck driver nga nagsugod sa sigarilyo ang ilang panagbangi nga nagresulta sa pagka-kalas sa kinabuhi sa tawo diha sa Manggahan,Brgy Balulang ning syudad.
Miingon si Jerson Cantonmayor kinsa sakop sa Dagohoy Security Agency nga nawad-an siya’g kontrol kay nangita’g bikil kaniya ang biktima.
Kini ang hinungdan nga nagpugos siya pagpabuto sa armas punting sa biktima hinungdan sa kamatayon niini.
