CAGAYAN DE ORO CITY – Nadakpan subay sa lima ka warrant of arrest ang taas nga opisyal sa rebeldeng New People’s Army o NPA samtang hilom nang nanarbaho sa pribadong kompanya sa Tagoloan,Misamis Oriental.
Giila ni Police Lt Col Alfredo Ortiz Jr,commander sa City Mobile Force Company ang dinakpan nga si Richard Hebia,kinsa nagsilbi kaniadto nga vice company kumander sa CPP-NPA nga naglihok sa Misamis Oriental ug Caraga region.
Miingon si Ortiz nga kabahin sa giatubang nga mga kaso ni Hebia ang upat ka attempted murder ug frustrated murder sa nagkadaiyang korte dinhi sa syudad.
Samtang gi-kuwestiyon sa kanhi CPP-NPA vice company kumander nga si Richard Hebia ang mga kaso nga nalatid sa warrant of arrests nga gigamit sa PNP aron siya dakpon.
Miingon si Hebia nga tinood nga misulod kini sa kalihukan tungod sa sobra nga abuso kaniadto sa militar samtang sila kabus nga nanginabuhi sa lungsod sa Claveria,Misamis Oriental.
Gibutyag niini nga kuwestiyabli ang maong mga kaso kay nagbalik na kini sa sabakan sa balaod ug misulod pa sa politika diha sa lungsod sa Lagonglong ning lalawigan.
