CAGAYAN DE ORO CITY – Patay ang truck driver ug backrider sa motorsiklo sa dugu-ong aksidente sa Purok 5, Zigzag Road, Brgy Palacapao,Quezon, Bukidnon.
Giila ni Bukidnon Provincial Police Office spokesperson Maj Jiselle Longgakit ang truck driver nga si Rolando Pugoy,37 anyos,minyo ug nagpuyo sa Brgy Libertad,Quezon ug Maribeth Salas,35 anyos nga taga-Buda,Marilog District,Davao City.
Miingon si Longgakit nga nakasinati sa depekto ang sakyanan ni Pugoy nga kargado sa tiles sa dihang nabunbulan niini ang motorskilo nga gimaneho usab ni Domingo Salas diin naka-angkas ang iyang kapikas nga si Maribeth.
Dugang sa opisyal nga tungod sa kakusog sa impact sa panagbangga,pulos nahulog sa pangpang ang duha ka sakyanan hinungdan sa kamatayon ni Pugoy ug sa ginang.
Samtang nadala pa usab sa ospital ang truck helper ni Pugoy nga si Raymond Pugoy tungod sa naangkon nga mga bun-og sa lawas.
Giimbestigaran pa ni Quezon Police Station commander Maj Carlito Chua Jr ang maong hitabo kagahapong adlawa.
