CAGAYAN DE ORO CITY – Samaron nga nadala sa provincial hospital ang usa sa tulo ka suspetsado sa illegal drug trading nga unang gipaubos sa anti-drug buy bust opertion sa kapolisan sa Purok 5,Barangay East Kili-Kili,Wao,Lanao del Sur.
Kini human napusilan sa mga pulis ang suspek nga si Jamil Pobe kay miaksyon sa pagpangilog sa armas ang mga kauban nga si Jabar Tambak Balangitao ug target suspect nga si Andy Rasdy Panarangin alyas Utol sa dihang natigayon na unta ang transaksyon sa ilegal nga droga.
Gibutyag ni Lanao del Sur Provincial Police Office Director Col Christopher Panapan nga natigayon na ang pinalitay sa ilegal nga droga sa dihang nakabantay ang mga suspek nga mga pulis ang gika-transaksyon hinungdan nga gisulayan nila’g ilog ang armas sa poseur-buyer mao nga napusilan si Pobe.
Gidala’g dali sa district hopsital sa Wao ang suspek apan gibalhin sa Kibawe Provincial Hospital sa Bukidnon alang sa dugang medikasyon.
Binatanyan sa mga pulis ang suspek sa ospital samtang apil sa nadakpan si Balangitao ug gipangita pa si Panarangin nga naka-eskapo sa maong hitabo.
Kasong pagsupak sa Comprehensive Dangerous Drugs Act of 2022 ang mga dinakpan ug bisan ang naka-eskapo nga si Utol.
Una nang nabawi sa PNP ang balor sa gatos gramos nga gitoohang shabu nga dunay 680-mil nga market value.
