CAGAYAN DE ORO CITY – Isaka na sa Police Regional Office 10 ang ilang alerto nunot sa pagsugod na sa election period sa nagsingabot nga May 9 presidential ug local elections sa nasud.
Gibutyag ni PRO 10 spokesperson Lt Col Michelle Olaivar nga hulaton nila ang gitakdang pagpatawag kanila sa Commission on Elections kuyog ang AFP alang sa synchronize nga mga lakang nga pagpatuman sa mga gabayan sa aron mamintinar ang kahusay ug kalinaw sa piliay.
Magsugod ang election period sa Enero 9 ug molungtad sa Hunyo 8 ning tuiga.
Subay usab sa nalatid sa Comelec resolution no. 10695,himoon na ang constitution sa Board of Canvassers,Electoral Boards,DepEd Supervising Officers ug Supporing Staff sugod ning adlawa padulong Enero 31 ning tuiga.
Samtang gitumbok na sa PRO ang mga lugar nga magsibling hot spots alayon sa 2022 elections dinhi sa rehiyon.Kini subay usab sa sukdanan nga gilugwa sa Camp Crame nga kabahin sa taliabot nga piliay sa nasud.
Gibutyag ni Olaivar nga gihimo kini nila kay dunay pipila ka armed groups nga ilang na-monitor apan dili lamang una nila mabutyag sa publiko.
Siya miingon nga gihulatan na lamang nila ang pag-aprobar sa Comelec kon masulod pa sa election hot spots ang maong mga lugar nga gilauman nila nga dunay init nga panagtigi sa politika.
Dumduman nga sa miaging Disyembre 2021,naigo sa sniper bullet ang ulo ni Lopez Jaena,Misamis Occidental Mayor Michael Gutierrez samtang mitambong sa Christmas party sa bando ni Deputy House Speaker Henry Oaminal sa Tangub City.
