CAGAYAN DE ORO CITY – Mag-atubang sa kasong pagsupak sa Anti-illegal Mining Act ang duha ka tawong dinakpan nga giingong nalambigit sa pagmina-mina sa bukirang sakop sa Brgy Mahayahay,Manticao,Misamis Oriental.
Kini human hiniusang gilusad sa tropa sa Regional Mobile Force Batallion o RMFB 10 ug Manticao Police Station inubanan sa koordinasyon sa Mines and Geo-Sciences Bureau 10 rason nadakpan sila alyas Mercury nga taga-Cagayan de Oro City ug alyas Minero nga gikan usab sa Zamboanga del Sur.
Nabawian ang mga dinakpan sa 16 ka rod mill drums, 28 ka pump belts, duha ka induction motors, tulo ka connecting rods, tulo ka fiber pans, 25 ka sako sa PVC resin, 42 ka steel rods, duha ka air-cooled diesel engines, 10 ka salo sa gitoohang minerals ug one-fourth sack sa borax nga bana-banang mikonstar sa PhP530,350.00.
Namahayag si Police Regional Office 10 spokesperson Major Joann Navarro nga ang maong kalampusan ang tubag usab sa laing operasyon batok illegal miners nga gilusad sa tropa nga nakabase sa Iligan City.
Kini human nabawi usab sa Iligan City Police Office – City Mobile Force Company, 1005th Maneuver Company sa RMFB 10 ug Iligan City Police Station 6 ang unom ka ball mill rods, red diesel engine generator, blue induction motor, diesel engine motor ug green motor pump nga mikostar sa 450,000.00 sa Sitio Caribao,Brgy Mainit sa maong syudad.
Siya miingon nga gawas niini,nakasakmit usab ang tropa sa 1005th RMFB 10,Iligan City Mobile Force Company, ICPS 6, ICPS 3, S2 RMFB 10 ug CIU Iligan sa walo ka rod mills, duha ka steel rods, air filter motor, Victor electric motor with pump belt, nga mikantidad sa 220,000.00.
Dumduman nga hugot ang pasidaan ni PRO 10 Director Brig Gen Jaysen De Guzman sa ilang tropa nga gukdon ang tanang nalambigit sa illegal mining activities sa rehiyon ilabina sa bukiran sa Cagayan de Oro City,porsyon sa Misamis Oriental ug Iligan City.
