CAGAYAN DE ORO CITY – Bakak ug walay kamatuoran ang gipasiatab sa kanhi administrasyon nga hayan gigamit sa politikanhong katuyuan ang cash advances nga balor 330 milyones pesos sa liderato ni City Mayor Rolando ‘Klarex’ Uy ning syudad.
Kini maoy tubag sa tigpamaba ni Klarex nga si Janboy Actub sa gibulgar sa kampo ni kanhi City Mayor Oscar Moreno kabahin sa gigamit nga mga empleyado sa city hall aron malugwa ang minilyong balor sa cash advances sa hinapos nga bahin sa 2022 ug entrada sa 2025.
Siya miingon nga normal nga transaksyon ang cash advances kay gitugot man kini sa balaod haom sa pagsunod sa mga gabayan usab sa balaod sa nasud.
Miingon si Actub nga nalatid usab sa Commission on Audit Circular no. 97-002 nga gitugot ang cash advance sa kondisyon nga tukma accounting,auditing ug liquadition processes.
Dugang niini nga makalaum ang katawhan nga wala usiki o ibulsa ang matag-sentabo sa panudlanan sa dakbayan.
Hinoon,dili na makurat ang kampo ni Uy kay panahon sa eleksyon hinungdan nga normal ang pagsinabligay sa mga nagkadaiyang isyu nga gikan sa ilang mga kaatbang sa politika.
Si Moreno ug Klarex nga kanhi magka-alyado ang magka-atbang sa pagka-mayor alang sa May 12 elections.
