CAGAYAN DE ORO CITY – Sang-atan sa kasong murder with robbery ang duha ka magsoong trabahante nga gitudlong responsabli sa ngilngig nga pagpatay sa magtiayong Maranao-Muslims mismo sulod sa ilang gipanag-iya nga kan-anan sa Brgy Sarimanok,Marawi City,Lanao del Sur.
Gibutyag ni Marawi City Police Station commander Lt Col. Muhidin Pagayawan nga natultulan ang mga bagitong mga suspek nga nagtago sa Brgy. Holy Redeemer, Butuan City sa Caraga region.
Gitumbok ang mga suspek nga sila Jewel ug Jemuel Olaran,anaa sa legal nga edad nga kanhi mga trabahante sa magtiayong Usodan ug Baira Monte nga pulos wala na’y kinabuhi dihang nadiskobre sa anak sulod sa B&E Inasal sa Marawi.
Dugtong niini,gilayong gikasa ang luag nga operasyon subay sa mando ni Marawi City Mayor Atty. Majul Gandamra batok sa mga suspek nga natuoran sa Butuan City.
Nasuta sa imbestigasyon nga daghang bililhong kabtangan ang nawagtang sa magtiayon nga naglakip sa salapi ug mga alahas ang mga biktima.
Sa kasamtangan,detinado na sa Marawi City PNP sa magsoon nga hampakan sa kasong kriminal sa piskalya sa Lanao del Sur ning semanaha.
