CAGAYAN DE ORO CITY – Nag-atubang na kasong pagsupak sa Comprehensive Dangerous Drugs Act of 2002 ang tulo ka suspected shabu sellers nga nasignit sa mga operatiba sa Philippine National Police sa magkalahing highly urbanized cities sa Northern Mindanao.
Pagsaysay ni Police Regional Office 10 spokesperson Major Joann Navarro nga mihimo sa Commission on Elections checkpoint ang tropa sa Police Station 5 sa Iligan City Police Office hinungdang nasakote ang 21 anyos nga si alyas Kris sa Purok 15, Brgy. Tibanga, Iligan City.
Nabawian ang suspek sa sobra 15 gramos nga gitoohang shabu nga nagkostar sa sobra 106-mil pesos nga gisulod sa iyang sling bag kuyog ang ubang paraphernalia.
Sa pikas bahin,nasignit usab sa hiniusang pagdasmag sa tropa sa PNP ug PDEA 10 ang regional priority target kuyog ang batos niini sa operasyon sa Purok 5,Naga,Brgy Puerto ning syudad.
Gibutyag ni Navarro nga maoy nasigpaw sila alyas LJ,26 anyos ug ang target nga 18 anyos nga si alyas Juvjuv diin sila nakuhaan sa 50 gramos nga dunay balor 340-mil pesos ug ubang paraphernalia.
Pulos detinado na ang mga dinakpan samtang gihulat ang mando nga isulod sa regular jail facility sa maong mga syudad.
Dugtong niini,giila ni PRO 10 regional director Brig Gen Jaysen De Guzman ang mga kalampusan sa state forces nga naningkamot paglumpag sa kaylap pa gihapon nga ilegal drugs.
