CAGAYAN DE ORO CITY – Nag-atubang sa kasupakan sa Comprehensive Dangerous Drugs Act of 2002 ang duha ka suspected drug sellers nga nasignit sa kapolisan ug mga operatiba sa Philippine Drug Enforcement Agency 10 sa Purok 1,Brgy Central Población,Kalilangan,Bukidnon.
Miila ang Kalilangan Municipal Police Station sa mga dinakpan nga sila Samantha Rosal,19 anyos ug Abdul Didato Madunting alyas Odak,23 anyos nga pulos nagpuyo sa Davao de Oro Province sa Region 11.
Sumala sa impormasyon,target sa hiniusag operasyon sa Kalilangan PNP kuyog ang PDEA 10 si Odak kinsa tratado nga high value target diin nakuhaan kini sa halos 300 gramos sa gitoohang shabu nga mikostar sa kapin 2 milyones pesos.
Nabawi usab gikan sa mga dinakpan ang libo ka pesos cash nga buy bust money,celphone,motorsiklo ug personal nga kagamitan.
Gitakdang itugyan sa mga otoridad sa regular nga pasilidad sa prisohan ang mga dinakpan sa oras nga imando na sa korte nga mohawid sa ilang kasong giatubang.
