Gipasiugda ni Atty. Nazir Ynawat, national president sa Alliance of Advocates Federalism in the Philippines, nga ang mga protesta sa milabay nga Labor Day nagpakita nga kinahanglan seryosohon sa gobyerno ang nag-unang mga problema sa nasud ug dili lang magpokus sa pamolitika.
Namahayag si Ynawat sa Bombo Radyo nga padayon ang kalisod nga nasinati sa mga mamumuo tungod sa kakulang sa angay nga pagtaas sa sweldo, bisan nagpadayon ang pagsaka sa presyo sa mga palaliton.
Dugang pa niya, ang nagkadakong utang sa nasud ug ang pagsaka sa dolyar batok sa piso nagpasamot sa kahimtang sa ekonomiya, nga direkta nga nakaapekto sa ordinaryong Pilipino.
Giingon usab niya nga kinahanglan tutokan sa gobyerno ang korapsyon ug ang hustong pagdumala sa ekonomiya imbes nga magpabiling sentro sa politikanhong panagbangi.
Alang kang Ynawat, ang mga kalihukan sa mga mamumuo usa ka pahimangno nga dapat unahon ang kaayohan sa katawhan aron malikayan ang mas lalom nga krisis sa umaabot.
