Giharos sa Filipina tennis star nga si Alex Eala ang usa ka dominanteng kadaogan batok kang Oleksandra Oliynykova sa Ukraine aron opisyal nga makaabante sa ikatulo nga round sa US Open sa New York City.
Gipamatud-an sa ika-17 nga seed nga si Eala ang iyang kaalisto sa Louis Armstrong Stadium human niya gidominar ang maong sangka pinaagi sa iskor nga 6-1, 6-4.
Kining maong kalamposan maoy nagsilbing tam-is nga pagbawi sa 20 anyos nga Filipina nga una nang napilde sa maong Ukrainian sa ilang pag-atbang sa Internationaux de Strasbourg niadtong Mayo.
Tungod sa maong kadaogan, nakatakda nga makigbatok si Eala sa modaug sa dula tali sa Amerikanang si Iva Jovic ug British qualifier nga si Francesca Jones alang sa sunod nga round sa maong katapusang Grand Slam sa tuig.
