Gipanawagan sa grupong Inday Sara Movement Philippines nga himay himayon ug ipagawas sa Malacañang ang detalyadong kwentada sa bilyones ka pesos nga nagasto sa pag host sa ASEAN Summit aron masiguro ang tulubagon sa pondo sa publiko.

Gipadayag ni Inday Sara Movement Convenor Daniel Nobleza nga apil sa angay ipasabot sa gobyerno ang dugang gasto sa pagtaklob og mga plywood sa mga lugar sa informal settlers sa Parañaque City aron lang dili makita sa mga bisita ang tinuod nga kahimtang sa kakabos.

Gisugyot ni Nobleza nga mas maayo unta kon gi-reroute na lang ang mga sakyanan sa delegado imbes nga mogasto pa og pagtabon sa mga kabalayan nga makapaubos sa dignidad sa mga kabus.

Gitataw sa convenor sa maong grupo nga dili maayong pamaagi ang pagtago sa tinuod nga sitwasyon sa mga Pilipino aron lang magpakita og maayong imahe sa mga langyawng lider.-