CAGAYAN DE ORO CITY – Wala makaangay si City Mayor Oscar Moreno sa daw paglimit sa kapolisan sa impormasyon sa kidnapping incident sa usa ka Chinese national diha sa Brgy Tablon ning syudad.
Kini human halos dili itug-an sa kapolisan ang identity sa tulo ka Chinese nationals nga midagit sa biktima nga si si Wang Zhizhong,45 anyos nga residente sa maong lugar.
Miingon si Moreno nga angayang itug-an sa kapolisan kon unsa ang haom masayran sa publiko aron dili masaypan nga may gitago sa hitabo.
Una usab niini,giingong naghangyo sa kapolisan ang biktima nga dili manganlan atubangan sa publiko.
Samtang gisaway sa committee on trade and commerce chairman Kag George Goking ang hinimuan sa tulo ka Chinese nationals nga nangdagit sa kauban nila nga Intsik sa Brgy Tablon ning syudad.
Miingon si Goking nga angay lamang imbestigaran ug ipa-deport balik China kon makit-ang sad-an sa hitabo.
Gibutyag sa opisyal nga naghatag lamang sa dakong kaulawon ang maong mga Intsik nga dinhi sa dakbayan.
