CAGAYAN DE ORO CITY – Nadakpan sa hiniusang operasyon sa tropa sa CIDG-10 ang aktibong brgy kagawad,brgy tanod ug kanhi sakop sa Philippine Marines sa gisilbi nga search warrants gikan sa korte diha sa Zone 9,Sunrise,Brgy Mambuaya ning syudad.
Giila ni CIDG-CdeO Team commander Maj Lucita Baltar ang mga dinakpan nga si Mambuaya Brgy Kag Spark Johnan Macana,ulitawo;Jolito Melitares,ug kanhi Philippine Marines member Charlie Pajaron Ordinan mga pulos hingkod ang edad nga nagpuyo sa maong lugar.
Gibutyag ni Baltar nga daghan ang mga reklamo batok sa mga suspek hinungdan nangayo sila’g pagtugot kang RTC Branch 18 Executive Judge Dennis Alcantar aron sikopon sila kagahapon sayo sa buntag.
Si Macana ang gitudlo nga lider sa grupo kinsa nalambigit sa illegal logging, land grabbing ug nagsulod sa ilegal nga pagmina-mina sa maong brgy.
Nakompiskar ang tulo ka homemade shotguns,duha ka 38 kalibreng armas,granada,mga bala ug cartridges sa klase-klaseng armas kagahapon sa buntag.
