CAGAYAN DE ORO CITY – Laing reklamo ang mipuntarya sa mga nagdumala sa city hospital ning syudad.
Kini human giakusar ni Punong Brgy Vic Talingting nga namatay ang ilang pasyente nga naila nga si Jennifer Mahumot kay gibalibaran ma-admit sa maong ospital.
Kini gumikan kay walay referral gikan sa ilang health center.
Gibutyag sa opisyal nga kay wala moagi sa ilang brgy ang paryente sa biktima kay emerhensiya ang sitwasyon rason nga wala kini mahatagi’g referral slip pag-abot aron ikapakita sa city hospital.
Dugang ni Talingting nga mismo na ang taga- city hospital na ang mihatag sa referral sa tagtungod sa pasyente aron madali pag-atiman sa taga- Northern Mindanao Medical Center apan hingpit kining nabugtuan sa kinabuhi.
Miingon si Talingting nga dismayado sila sa giingong palisya nga gipatuman sa maong balay-tambalanan.
Siya miingon nga anaa sa emerensiya nga sitwasyon ang pasyente rason nga gihatagan unta kini sa konsiderasyon.
Samtang wala pa’y tubag niini ang tigdumala sa city hospital kabahin sa isyu.
Sa miaging regular session sa konseho,subli nag-kuwestiyon ang kapas sa mga nagdumala sa maong ospital ning syudad.
