CAGAYAN DE ORO CITY – Gusto ni City Mayor Oscar Moreno nga makig-koordinar si City Police Director Col Henry Dampal sa National Bureau of Investigation o NBI ning syudad.
Kini aron paspas ug mapadali ang pagsulbad sa pagpatay sa negosyante nga si Carlos Lam sa Sitio Looc,Brgy Canitoan sa dakbayan sa miaging semana.
Miingon si Moreno nga nasubo kini sa gidangatan ni Lam rason nga angayang mahatagan sa dinaliang hustisya.
Si Lam ang dul-it nga gipusil sa nag-inusarang suspek samtang anaa sulod sa iyang sakyanan hinungdan sa kamatayon niini.
Samtang gipasalig sa Cagayan de Oro City Police Office o COCPO nga sulbaron sa dali nga panahon ang kamatayon ni Lam nga iladong negosyante sa syudad.
Kini bisan kon unang naglisod ang kapolisan pagtumbok kon unsa ang motibo sa maong kremin.
Miingon si COCPO spokesperson Maj Evan Vinas nga wala hunungi sa ilang mga imbestigador ang pagpangita sa mga ebedensiya.
Kini aron matumbok ang utok sa kremin.
Una nang nagdumili ang COCPO pagtukod sa task force aron maoy motutok sa kamatayon sa biktima.
