CAGAYAN DE ORO CITY – Gibuhian una sa kapolisan ang drayber sa truck nga nakabangga sa nakaparadang truck nga gikamatay sa upat ka tawo sa Sayre Highway, Sitio Sta. Ana, Impasugong, Bukidnon.
Miingon si Police Captain Richlie Murallon, hepe sa Impasug-ong Police Station nga napugos sila nga ipaggawas sa prisohan si Edgardo Sotero Badan human pakyas ang mga pamilya sa namatay nga mokaso batok sa suspek kagahapon sa buntag.
Miingon si Murallon nga mihangyo kaniya ang pamilya sa mga namatay nga ila unang ipahiluna ang patay’ng lawas sa ilang mga minahal sa kinabuhi ayha mokaso batok sa drayber.
Hisayran nga patay ang pasahero nga sila si Rudy Ganol, Nilo Lahayon, Nelson Gumaling ug Rogelio Benoy dihang natangtang ang propeller sa ilang gisakyang trak ug mibangga sa nakaparadang Road Roller Heavy Equipment concrete Mixer Truck nga gipanag-iyahan ni Eduardo Canlas.
