CAGAYAN DE ORO CITY – Gimatud-an nila ni Provincial Gov Peter Unabia ug District 2 Cong. Bambi Emano nga wala masiak apan pabiling lig-on ang alyansa sa Partido Padayon Pilipino ug PAGLAUM sukwahi sa nagkatag nga intriga nga sila mag-atbang sa 2025 elections sa probinsya.
Kini human nag-deklara na sila sa ilang line-up alang sa provincial candidates ingon man alang sa duha ka component cities ug kalungsuran sa Misamis Oriental sa Amaya View sa Brgy Indahag ning syudad kagahapong adlawa.
Miingon si Unabia nga unta saligan sa laing higayon sa katawhan ang iyang administrasyon kuyog sila Vice Gov Jigjag Pelaez, Cong Emano ug 1st District Cong. Christian Unabia.
Sa 23 ka lungsod,bugtong ang Lugait lang ang walay kandidato sa alyansang Padayon Pilipino-Paglaum.
Hisayrang daghan sa mga mayores nga kanhi sakop sa National Unity Party nga gidala ni former 2nd District Congresswoman Juliette Uy ang nakuha na sa Paglaum-Padayon Pilipino alliance.
