CAGAYAN DE ORO CITY – Patay ang igsoong-lalaki nga giingong giunay pagpusil sa kanhi station commander sa Cugman Police Station sa Purok 2,Brgy Tablon sa syudad ning adlawa.
Giila ni Cugman Police Station commander Major Jason Felisilda ang suspek nga si retired Major Eddie Acut kinsa manghod sa gipusil nga biktima nga si Henry Acut nga pulos nagpuyo sa lugar.
Sumala sa inisyal nga imbestigasyon,kabahin sa lantugi sa yuta ang rason kung nganong nagkalalis ang magsoon nga mi-resulta sa dugu-ong kremin.
Nasuta nga mismo gawas sa balay sa suspek natigayon ang pagpusil ngadto sa biktima gamit ang gitoohang kalibre 9mm pistol.
Dugang ni Felisilda nga gihulat pa ang opisyal nga pakisusi sa Scene of the Crime Operatives kung asa ang mga igo sa biktima nga hinungdan sa kamatayon niini.
Sa pagkutlong balita, mihimo na sa pagpangita ang mga operatiba sa Cagayan de Oro City Police Office kabahin sa suspek nga paspas misibat sakay sa iyang kaugalingong sakyanan.
