Gisupak ni Defense Lawyer Peter Haynes ang gipamugos nga tolo ka bulan nga pagpanigom sa ebidensya ayha ang trial proper sa kaso sa iyang kliyente nga si Kanhi Presidente Rodrigo Duterte.
Mahinumduman nga sa gilusad nga tolo ka sesyon sa Status Conference sa kaso ni Duterte, migula ang kagustuhan sa prosecusyon nga mu-abante na dayon ang hearing human gisugyot sa Office of the Prosecutor nga Nobyembre 30 ang ilang target date sa unang hearing sa kaso, ug sa Setyembre 30 nila ipasa ang tanan gipangayo nga dokumento sa Trial Chamber III.
Alang kang Haynes, dili paborable kini sa iyang kliyente ilabe na nga duol ra kaayo ang pagdungog sa “Christmas Season” o Pasko.
Gawas niini, mi-apelar si Haynes sa pagsusi subli sa kahimtang sa panglawas ni Duterte kung angayan ba kining musalmot sa iyang pagdungog.
Kung masuta sa mga doktor nga lagsik pa ang lawas sa 81 anyos nga defendant, mihangyo ang depensa nga hatagan sila sa 14 hangtud 19 ka bulan alang sa pagpreparar sa pagdungog.
