Giawhag sa International Criminal Court (ICC) ang mga personahe sa Philippine National Police (PNP) nga motestigo batok ni kanhi Presidente Rodrigo Duterte.
Sa usa ka pamahayag, ang ICC miapelar nga direktang motestigo sa mga insidente nga may kalambigitan sa giingong mga krimen batok sa katawhan sa kanhi Presidente kalabot sa gubat batok sa drugas, apil na ang mga sakop sa nasudnong kapolisan ug ubang law enforcement agencies nga nalambigit sa mga insidente nga mitumaw ug makigsulti sa mga sakop sa buhatan.
Naghatag usab ang ICC sa online nga porma diin ang mga testigo makasumiter sa ilang mga reklamo.
Kahinumduman nga sa kataas sa kampanya batok sa ilegal nga drugas ubos sa administrasyong Duterte, si Senador Ronald Dela Rosa ang nagsilbi kaniadto nga hepe sa PNP, kinsa hangtod karon wala pa mopatim-aw sa publiko nunot sa mga taho sa warrant of arrest batok kaniya gikan sa ICC.
