CAGAYAN DE ORO CITY – Gikasuhan sa kapolisan sa murder ug frustrated murder si kanhi Taglimao Brgy Kapitan William Guillani sa piskalya ning syudad.
Kini human migawa sa imbestigasyon sa kapolisan nga si Guillani ug laing usa pa ka John Doe ang giingong suspek sa pagpa-pusil-patay sa negosyante nga si Carlos ‘Caloy’ Lam sa gawas sa iyang fightingcock farm sa Sitio Looc,Calaanan,Brgy Canitoan ning syudad sa miaging Hulyo ning tuiga.
Miingon si Capt Rutherford Ondin,deputy director for administration sa Cagayan de Oro City Police Office nga ang maong pagkatumbok kang Guillani ang subay usab sa subsob nga pag-imbestigar sa Bulua Police Station.
Una nang gimando ni City Mayor Oscar Moreno sa PNP nga sulbaron ang kaso sa labing dali nga panahon aron mataral sa hukmanan ang mga mihimo sa kremin.
Si Lam ang gikan sa lungsod sa Opol,Misamis Oriental nga nagdala sa mga manok igsasabong dihang giduulan kini sa naka-motorsiklo nga suspek ug gilayong pusil sulod sa iyang sakyanan hinungdan sa kamatayon niini.
Si Guillani ang kanhi kaila ug nahimong kritiko ni Moreno nga nagkaso usab kaniya kabahin sa isyu sa kompanyang Ajinomoto sa miaging katuigan ning syudad.
Sa pagkutlo usab ning balita walay pa’y komento si Guillani batok sa pasangil ug bukas ang Bombo Radyo alang sa iyang panig kabahin niini.
