CAGAYAN DE ORO CITY – Giangkon sa Malaybalay City Police Station nga sayop ang na-post nila nga info-graphics diin nag-akusar sa mga suporter sa ABS-CBN nga nagpaluyo sa terorismo sa nasud.
Kini human gi-share sa maong police station ang art card diin makita ang daghang hulagway sa mga indibidwal nga naghawid sa placards nga nagsuporta sa pag-renew sa prangkisa sa TV network.
Miingon si Lt Col Jerry Tambis,hepe sa Malaybalay City Police Station nga dili intensyon sa iyang pulis nga dauton ang TV network.
Namugos si Tambis nga alang sa NPA supporter groups ang pagtuki sa terorismo ug dili sa nagsira nga TV network.
Hinoon,nangayo’g pasaylo si Tambis sa publiko ug sa mga sakop sa prensa kabahin sa ilang kasaypanan sa social media.
Samtang mosamot lamang ang kagubot kon sagulan pa sa PNP sa isyu sa terorismo ang gisagubang nga suliran sa napasirad-an nga TV network ABS-CBN.
Kini ang reaksyon sa kanhi TV reporter ug activist Sen Risa Hontiveros kabahin sa pasangil nga suporters sa terorismo ang mga sakop sa media nga miuban sa krusada sa maong TV giant.
Miingon ang senadora nga unta prioridad sa gobierno ang pagpangita’g paagi kon unsaon ang pagsulbad sa suliran sa coronavirus disease dinhi sa nasud.
