CAGAYAN DE ORO CITY – Naka-kompiskar ang lower units sa Police Regional Office 10 sa balor 9 milyones pesos nga gitoohang ilegal nga droga gikan sa 52 ka personalidad gikan sa 84 ka katibuk-ang nadakpan palibot sa rehiyon.
Gibutyag ni PRO 10 spokesperson Major Joann Navarro nga sa 35 ka anti-illegal drugs operations, nakompiskar ang 1,327.679 gramos sa gitoohang shabu nga mikostar sa sobra 9 milyones pesos.
Sa mao usab nga anti-criminality operations, nahipos sa tropa ang 28 ka indibidwal diin gilangkuban sa tulo ka most wanted ug 25 nga wanted persons nga nag-atubang sa nagkadaiyang mga kaso.
Sa pikas bahin, nakadakop usab sila sa upat ka tawo nga nalambigit sa ilegal smuggling operations diin nabawi ang halos 90-mil pesos nga mga sigarilyo.
