CAGAYAN DE ORO CITY – Buot sa Police Regional Office 10 masilotan ang pipila ka pulis nga ubos sa Divisoria Police Station nga nag-viral sa social media kay nangulata sa pipila ka menor de edad nga unang gi-safety keeping niini gikan sa pagka-karambola sa Corrales Avenue ning syudad.
Kini human wala matago sa atensyon ni PRO 10 Director Brig Gen Lawrence Coop ang hitabo.
Miingon si PRO 10 spokesperson Police Maj Joann Navarro nga nagpasalamat sila sa katawhan nga nagpakabana aron makaabot sa ilang atensyon ang maong alegasyon sa pipila sa mga sakop nga ubos sa Cagayan de Oro City Police Office.
Ang maong mga bata ang kabahin sa nagka-rambol nga grupo sa duha ka gangs diin nag-resulta sa pagkadunggabi-patay sa 14 anyos nga si Nathaniel Ebalang samtang na-aresto usab ang pinaka-suspek nga si Raul Lumamba sulod ning semanaha lamang.
Una usab niini,gilayong gipatubag ni Divisoria Police Station commander Police Maj. Sebastian Chua Jr ang iyang mga pulis nga naka-duty niadtong tungura.
Dumduman nga nadismaya’g maayo si City Director Col Aaron Mandia sa gipakitang taras sa pipila sa iyang mga pulis ug nanganti nga dili palabyon ang hitabo hinungdang dunay gihimong internal investigation kabahin niini.
