CAGAYAN DE ORO CITY – Gikalipay sa Ozamiz City Police Office ang gipahamtang nga life imprisonment sa Quezon City Regional Trial Court Branch 79 batok sa anak ni late Ozamiz City Mayor Reynaldo Parojinog Sr nga si Reynaldo Parojinog Jr.
Gibutyag ni Ozamiz City Police Director Major Jovie Espenido nga kalampusan dili lamang sa kapulisan kundi lakip na sa mga residente sa Ozamiz City nga dugay na nga nangandoy nga masumpo ang problema sa droga sa ilang lugar.
Dugang niini nga pinaagi sa gipaggawas nga desisyon sa korte, nagpasabot lamang kini nga pulos bakak ang alegasyon sa kampo sa mga Parojinog nga planted ang mga droga ug illegal drug paraphernalia nga nakuha gikan sa panimalay niini.
Samtang giila usab nga kalampusan sa gobyerno sa Criminal Investigation and Detection Group o CIDG-10 ang life imprisonment nga gipahamtang sa korte batok kang Reynaldo Parojinog Jr.
Si CIDG-10 regional director Lt Col Reymund Liguden miingon nga gitoohan sa korte ang mga bug-at nga ebidensiya nga ilang nakuha gikan sa mga Parojinog ug nagpasabot nga nahatagan sa hustisya ang mga nabiktima sa illegal nga binuhatan sa maong pamilya.
Hisayran nga si Parojinog Jr mao ang pinakaunang miyembro sa political family nga nakonbikto sa illegal na droga. Gawas sa life imprisonment, gipagbayad usab kini sa multa nga P500,000.
