Nakadawat sa baga nga pagsaway gikan sa social media ug sa mga kaubang senador si action-star politician Robin Padilla human kini migamit sa pinulungang “force majeure” sa pagkadamay sa Pilipinas sa tensyon sa China-Taiwan.
Subay sa post ni Padilla sa social media, iyang gibutyag nga ang giyera sa Middle East, terorismo, ug ang posibleng pagkadamay sa Pilipinas sa tensiyon sa China-Taiwan mahimong itawag nga “force majeure.”
Gumikan niini, daghang netizens ang misaway ug nag-ingon nga ang “force majeure” usa ka legal nga konsepto nga nagtumong sa mga panghitabo nga dili matagna ug dili malikayan nga nagapugong sa normal nga operasyon, ug dili kini mahimong gamiton sa mga sitwasyon nga posibleng mahitabo pa lang sa umaabot.
Ang mga senador sama nila Risa Hontiveros ug Erwin Tulfo misupak sa argumento ni Padilla. Samtang, inay “force majeure”, “unforced error” ang mubo nga reaksiyon ni Senador Panfilo Lacson.
Sa laing bahin, gipamugos gihapon ni Padilla nga ang “force majeure” naglangkog kini sa kagubot nga hinimo sa tawo sama sa giyera, terorismo, ug mga welga.
Hisayran nga ang isyu nakapukaw sa mas lapad nga diskusyon bahin sa Senate rules ug sa kahimtang sa responsibilidad sa mga opisyal sa publiko, kundiin adunay nadismaya ug nalingaw sa posisyon ni Padilla.
