CAGAYAN DE ORO CITY – Patay ang duha ka tawo, ug siyam ang angol sa pagdaro sa usa ka sakyanan sa mga tawong nagprosesyon sa dalan sa Barangay Alangilan, syudad sa Bacolod.
Subay sa inisyal nga imbestigasyon, nagpadulong na balik sa simbahan ang grupo sa mga deboto alas-siyete sa gabii dihang nahitabo ang aksidente.
Miingon ang mga nakasaksi nga unang gidumbol sa maong sakyanan ang usa ka tricycle, nga misangpot sa makalilisang nga hitabo.
Ang mga nasamdan daling gidala sa ospital, samtang ang drayber sa sakyanan nga usa ka Indian National, gikustodiya sa mga awtoridad alang sa dugang interogasyon.
Wala pay lead ang mga otoridad kung unsa ang matood nga hinungdan o motibo sa hitabo.
