Namahayag karon ang Philippine National Police o PNP nga patay na ang US vlogger nga si Elliot Eastman nga unang gidagit sa nagpatoong mga pulis sa Sibuco,Zamboanga del Norte sa milabay’ng mga semana.
Kini subay sa gisaysay sa usa sa mga suspek nga nadakpan sa kapolisan nunot sa tinguha pag-rescue sa 26 anyos nga American vlogger nga taga-estado sa Vermont.
Saysay ni PNP spokesperson Brig Gen Jean Fajardo nga sulti sa dinakpang suspek nga nagmagahi si Elliot nga mokuyog kanila hinungdang napusilan gamit ang M-16 rifle.
Siya miingon nga gidala pa gihapon sa kidnappers ang biktima apan gihulog nila sa dagat samtang sila pasibat.
Giingong naigo sa hita ug tiyan ang biktima nga hinungdan sa kamatayon niini.
Dumduman nga wala hunungi sa state forces ang pagpangita sa biktima sukad nga nadagit kini hinungdang tulo na sa kidnappers ang napatay sa engkuwentro sa Kabasalan,Zamboanga Sibugay.
Hisayrang nahidangat ang gidagit sa armadong grupo nga 26 anyos nga si Elliot sa Sibuco niadtong Oktobre 17 diin pabiling wala pa gihapon nakit-an ang lawas niini hangtod sa pagkutlo ning balita.
