CAGAYAN DE ORO CITY-Nalumos kay gitoohang gibira sa ‘ukoy’ ang 11 anyos nga batang lalaki dihang naligo sa suba sa Sitio Manggahan, Brgy Balulang ning syudad kaganihang buntag.
Giila ang biktima nga si John Carl Banglos ug nagpuyo sa maong lugar.
Nananghid ang biktima ngadto sa iyang inahan nga mo-absent sa pag-eskuwela aron mohimo sa pagkaligo sa suba kuyog ang pipila sa mga silingan niini.
Miingon ang magtiayong Joseph ug Mrs Banglos nga dihang nahulog sa gisakyang ‘balani’ sa saging ang biktima og gilayon kining nalumos.
Mihimo pa sa pagluwas ang mga kauban niini apan daw adunay nagpugong sa ilalom sa tubig nga dili mabira pasaka ang biktima hinungdan sa pagkalumos sa 11 anyos nga batang lalake.
Una niini, gisulti usab sa magtiayon nga bisan ang ilang kamagulangang anak ang nakasinati usab nga daw gibira ang tiil samtang padulong malumos apan naluwas ra sa mga kauban pagpangaligo sa miaging mga bulan.
