CAGAYAN DE ORO CITY-Hugot nga gibantayan sa kapolisan sa syudad sa Iligan ang 12 ka residential properties nga giingong gipanag-iyahan sa mga Maute ug ni former Marawi City Mayor Fahad Salic.
Si Salic ang nadakpan niadtong Hunyo 2017 tungod sa kasong rebellion.Matud ni Iligan City Police Office director Sr/Supt. Leony Roy Ga nga ila kining gi-monitor sa posibilidad nga may kalabutan kini sa Islamic State-inspired Maute terror group.
Ang maong mga balay ang makita sa Barangays Tomas Cabili,Tubod, San Miguel ug Tambacan.
Samtang,gihupay ni Ga ang kabalaka sa publiko kalabot na sa ilang gimonitor nga residential properties sa mga Maute.
Siya miingon nga wala pa sila’y nabantayan nga kahadlokan sa maong lugar hinungdan nga walay angayang kahadlokan ang publiko.
Giangkon ni Ga nga aduna sila’y namonitor nga mga okupante sa Barangay Tomas Cabili apan wala kini magdugay sa maong lugar.
Gani, gipasigarbo niini nga nagpabiling malinawon ang tibook dakbayan.
