PC: Threjann Noli
CAGAYAN DE ORO CITY- Gitutukan karon sa Bureau of Fire Protection o BFP ang shortage sa koryente nga hinungdan sa pagkasunog sa mga pinuy-anan sa 45 ka pamilya o 202 ka indibidwal sa Accreation Area,Brgy Macabalan ning syudad kagahapon.
Kini human nagsugod ang kalayo sa pinuy-anan ni Hilario ‘Caloy’ Alejano ug gilayong mikatag sa mga silingan niini.
Gikompirmar ni BFP chief investigator SFO1 Dennis Dalis nga usa ka senior citizen ang naangol atol sa sunog.
Mitala usab sa 1.9 milyon pesos ang inisyal nga damyos sa pagkasunog sa kabalayan sa maong lugar.
Samtang nangayo’g tabang si Macabalan Brgy Kap Norbel Saa sa city hall partikular sa CSWD alang sa 202 niya ka residente nga apektado sa sunog kagahapong adlawa.
Kini samtang gipahimutang ang 45 ka pamilya sa covered court sa Macabalan Elementary School gumikan sa hitabo.
Miingon si Saa nga magpabilin una ang mga biktima samtang pangitaan pa’g paagi sa brgy ug syudad ang kaplastaran sa ilang mga pinuy-anan.
Dugtong niini, gipaniguro ni City Administator Teddy Sabugaa nga mahatagan sa dinaliang ayuda sama sa banig, sapot ug pagkaon ang mga nasunugan.
Gitin-aw ni Sabugaa nga kadto lang tag-iya sa balay nga makakuhag beripikasyon kang Saa ang matunulan sa cash assistance gikan sa CSWD.
