CAGAYAN DE ORO CITY- Gimando ni City Mayor Oscar Moreno ang pagpatuman sa liquor ban ug pagdili pagpalupad sa mga aerial drones atol sa kapistahan sa Black Nazerene sa syudad ugmang adlawa.
Miingon si Moreno nga tuyo niini nga dili mabalda ang kalihukan ug malikay sa sobatahe ang kapistahan sa Nazareno.
Dugang ni Moreno nga hugot nga seguridad usab ang ipatuman sa mga lugar nga agian sa prosesyon ugmang adlawa.
Una usab niini,gipaniguro sa kapolisan ang 100 porsiento nga paghatag seguridad sa kalihukan.
Samtang,paspas nga pagresponde panahon sa emerhensiya ang mas gitutukan sa City Disaster Disaster Risk Reduction and Management Department o CDRRMD alayon sa fiesta sa Itom nga Nazareno.
Mismo ang ilang hepe nga si Allan Porcadilla ang mi-ingon nga upat ka mga medical station palibot sa St Augustine Metropolitan Cathedral ang ilang gipa-activate panahon sa Vigil Prayers.
Gawas niini, atol sa traslacion, duna usab dili ti-aw nga ihap sa medics nga muuban ug baklay sa mga deboto aron mapaniguro nga marespondehan nila ang angayan tabangan.
Kuyog niini ang mga nagkatag nga medical tents sa City Health Office ug Philippine Red Cross.
Naka-stand by usab sa palibot ang mga ambulansya sa Rescue 411 ug 911 units.
Subli, gitin-aw ni Porcadilla nga nagtoo sila nga mas daghan ang mudagsa sa traslacion ning tuiga tungod sa mas mubo nga ruta.
Gi-awhag ni Porcadilla ang mga deboto nga dili matingala sa mosabay nga “gentle giants” nga gibansay sa rescue mission operation sa CDRRMD.
