CAGAYAN DE ORO CITY- Giangkon ni Misamis Oriental Gov Bambi Emano nga pipila na sa mga residente ang mikumbinsir kaniya aron modagan pagka-mayor sa sunod eleksyon sa dakbayan.
Kini aron atbangan ang tinguha ni City Mayor Oscar Moreno pagdagan alang sa ikatulo nga termino sa umaabot nga piliay.
Si Emano miingon nga may mga residente ang giingong dismayado sa liderato ni Moreno tungod sa isyu sa kurapsyon.
Miingon si Emano nga mismo siya ang nainsulto tungod sa gipanulti sa katawhan nga dili na sila maka-agwanta tungod sa giingong lapad nga pagpangawat nga natigayon sa liderato ni Moreno sa syudad.
Apan bisan sa giingong pagpangumbinsir,miprangka si Emano nga dili niya talikdan ang katawhan sa lalawigan ilabina nga may nabilin pa kining usa ka termino aron makadagan pagka-gobernador.
Una nang gi-depensa ni Emano ang gihimong pagpa-special audit sa administrasyon ni Moreno aron matandi ang ilang pagdumala sa lalawigan.
Nagpasigarbo usab si Emano nga sukad nahimong town mayor sa lungsod sa Tagoloan ug pagsilbing kongresista sa ikaduhang distrito sa lalawigan,wala kini sukad nalambigit sa kurapsyon.
Hisayrang si Moreno ang sunod-sunod nakakuha’g temporary restraining orders ug writ of preliminary injunctions gikan sa Court of Appeals batok sa dismissal orders gikan sa Ombudsman.
