CAGAYAN DE ORO CITY-Nasikop pinaagi sa court search warrant ang gitumbok nga usa ka person of interest o POI sa kaso sa kamatayon ni University of Science and Technology of Southern Philippines (USTP) ug Philippine Association of State Universities and Colleges (PASUC) president Dr Ricardo “Ric” Rotoras dihang gipusil sa Golden Glow Village North Subdivision, Upper Carmen sa syudad niadtong Disyembre 2017.
Giila ni CIDG chief investigator SPO4 Noel Oclarit ang dinakpan nga si Architect Rey Galua kinsa kanhi faculty member sa USTP ug lumad nga taga-Kitcharao, Agusan del Norte.
Miingon si Oclarit nga ipaubos nila sa pag-imbestigar si Galua kon may kalabutan kini sa kamatayon ni Rotoras ilabina nga trabahante siya sa kontraktor nga adunay gitrabaho sa USTP diin gipahunong ni Rotoras.
Giklaro ni Oclarit nga gisikop si Galua tungod sa pagbaton sa giingong duha ka hand grenades; M-16 rifle; 45 caliber; 38 ug colt 45 pistol.
Nasikop si Galua samtang anaa sa iyang pinuy-anan sa Pueblo De Oro Subd, Barangay Lumbia ning syudad kaganihang buntag.
Dugtong niini, gibutyag usab ni USTP officer-in-charge Dr Rosalito Quirino nga gikalipay nila nga nasayran sa Bombo Radyo ang kalambuan sa kaso ug masaligon nga matumbok na ang mastermind sa kamatayon ni Rotoras niadtong Disyembre 2, 2017.
